ஷேக்ஸ்பியரின் துன்பியல் நாடகங்களில் பிரதானமானது ‘த ட்ராஜெடி ஆஃப் மெக்பெத்’. மத்திய கால ஸ்காட்லாந்தைச் சேர்ந்த மெக்பெத் மிகப் பெரிய போர் வீரன்; தன்னை உணராதவன்; மனைவியின் ஆலோசனையைக் கேட்டு மதியிழந்தவன். ஆட்சி அதிகாரத்தைக் கைப்பற்றும் ஆசையில் மன்னனைக் கொல்கிறான். நண்பனின் வாரிசு அரசனாகக் கூடும் என நண்பனைக் கொல்கிறான்.
மன்னனான பின்னர் அவனால் நிம்மதியாக ஆட்சி நடந்த முடிந்ததா, ஆசையில் ஆட்சியைப் பிடித்த அவனும் அவனுடைய மனைவியும் இன்பத்தை அனுபவித்தார்களா என்று கேட்டால் அதுதான் வாழ்வின் சுவாரஸ்மான திருப்பம். மன்னனைக் கொல்லத் தூண்டிய குற்றவுணர்வில் லேடி மெக்பெத் அவதியுறுகிறாள். ஆட்சி அதிகார போதையில் மெக்பெத் தன் நிம்மதியை இழக்கிறான், சீரான வாழ்வுக்குப் பதில் சீரழிவே மிஞ்சியது.
ஒரு கதையாகப் பல்வேறு திருப்பங்களையும் அதிகார போதையையும் நவீன மனிதனின் உளவியல்ரீதியான அலைக்கழிப்புகளையும் உள்ளடக்கிய நாடகம் இது. அதனால் இது எந்தக் காலத்துக்கும் பொருந்தும். ஆட்சி அதிகாரத்தின் மீது நாட்டம் கொண்டு கேடுகெட்ட செயல்களில் ஈடுபடும் மனிதர்கள் இருக்கும்வரை மெக்பெத் நாடகம் உயிர்ப்புடன்தான் இருக்கும்.
இந்தக் கதை பிடித்துப்போனதால் உலகப் புகழ்பெற்ற இயக்குநர் அகிரா குரோசோவா இதை அடிப்படையாகக் கொண்டு, அதில் ஜப்பானியக் கலாச்சார நுட்பங்களைக் கலந்துதான் ‘த்ரோன் ஆஃப் ப்ளட்’ படத்தை உருவாக்கினார். பிரபல இயக்குநர் ரோமன் பொலான்ஸ்கி இந்தக் கதையைப் படமாக்கியிருக்கிறார். இவை தவிர அநேக திரையாக்கங்களைக் கண்ட நாடகமான இது இங்கிலாந்தில் இப்போது மீண்டும் படமாகியிருக்கிறது.
இந்தப் படத்தின் படப்பிடிப்பை இங்கிலாந்திலும் ஸ்காட்லாந்திலும் நடத்தியிருக்கிறார்கள். ‘ஸ்நோடவுன்’ படத்தின் மூலம் அறியப்பட்டிருக்கும் ஆஸ்திரேலிய இயக்குநர் ஜஸ்டின் கர்சல் இயக்கியிருக்கும் மெக்பெத், 2015 மே 23 அன்று கான் படவிழாவில் முதலில் திரையிடப்பட்டது. கானின் தலையாய விருதான தங்கப் பனைக்குப் பரிந்துரைக்கப்பட்டது. ‘இன்க்ளோரியஸ் பாஸ்டர்ட்ஸ்’, ‘12 இயர்ஸ் எ ஸ்லேவ்’ உள்ளிட்ட பல படங்களில் நடித்திருக்கும் நடிகர் மைக்கேல் ஃபாஸ்பெண்டர் இந்தப் படத்தில் மெக்பெத்தின் வேடத்தை ஏற்று நடித்திருக்கிறார். ‘எ வெரி லாங் எண்கேஜ்மெண்ட், இன்ஸெப்ஷன் ஆகிய படங்களின் வழியே பரிச்சயமாகியிருக்கும் நடிகை மரியான் காட்டிலார்டு லேடி மெக்பெத் வேடமேற்றிருக்கிறார்.
இதன் முதல் டீஸர் 2015 ஜூன் 4 அன்று யூடியூபில் வெளியானது. அதை 26 லட்சத்துக்கும் மேற்பட்டவர்கள் பார்த்திருக்கிறார்கள். மெக்பெத்தின் கதை எத்தனை முறை படமானாலும் அத்தனை முறையும் அதைப் பார்க்க ரசிகர்கள் தயாராகவே இருக்கிறார்கள். ஷேக்ஸ்பியரின் படைப்புத் திறனால் அது சாத்தியமாகியிருக்கிறது. ஏற்கெனவே பார்த்த கதைதானே என ரசிகர்கள் இந்தக் கதையை ஒதுக்குவதில்லை என்பதற்கு வெளியாகியிருக்கும் பல மெக்பெத்கள் சான்றுகள்.
அதே எதிர்பார்ப்புடன்தான் இப்போது அவர்கள் இந்த மெக்பெத்துக்கும் காத்திருக்கிறார்கள். குருதியின் சேற்றில் கால் பதித்து ஆட்சியதிகாரத்தைக் கைப்பற்றியிருக்கும் இந்த மெக்பெத், கத்தியின்றி ரத்தமின்றி அகிம்சை வழியில் விடுதலை வாங்கிக்கொடுத்த காந்தியடிகளின் பிறந்த நாளான அக்டோபர் 2 அன்று இங்கிலாந்தில் வெளியாகப்போகிறது என்பது ஒரு முரண்நகையே. அமெரிக்காவில் டிசம்பர் மாதம்தான் திரைக்கு வரவிருக்கிறது.
செப்டம்பர் 25 தி இந்து நாளிதழில் வெளியானது
